Имрӯз варзишгари номдори мо, Шакармамад Мирмамадов, бо маҳорати фавқулода ва иродаи устувор дар мусобиқаи варзишии гуштингирӣ иштирок намуда, миёни паҳлавонони қавитарини кишвар ва берун аз он пирӯз гардида, Шоҳҷоизаи Раиси Вилояти Мухтори Кӯҳистони Бадахшонро ба даст овард! 

     Ин мусобиқаи варзишӣ бо иштироки паҳлавонон аз Тоҷикистон, Эрон, Қирғизистон, Узбекистон ва дигар кишварҳо баргузор шуда, муборизаҳо басо шиддатнок ва пур аз ҳаяҷон буданд!  Ҳар як варзишгар бо тамоми нерӯ ва маҳорати худ талош намуд, аммо Шакармамад Мирмамадов бо ҳунару қудрати беназир тавонист рақибони пурқуввати худро шикаст диҳад ва сазовори ҷойи аввал гардад! 

     Маросими ҷоизасупорӣ бо иштироки Раиси Вилояти Мухтори Кӯҳистони Бадахшон муҳтарам Мирзонабот Алишер Худобердӣ, Муовини намояндаи Президенти Ҷумҳурии Қирғизистон дар вилояти Ош Арстонокулов Талантбек Курбоналиевич, инчунин намояндагони дигар кишварҳо доир гардид. Дар фазои бошукӯҳи варзишӣ Шоҳҷоиза ба варзишгари мо супорида шуд, ки лаҳзаи фаромӯшнашаванда барои тамоми ҳамдиёронамон гардид! 

      Ин ғалаба на танҳо комёбии шахсии Шакармамад Мирмамадов, балки ифтихори тамоми Тоҷикистон ва бахусус Вилояти Мухтори Кӯҳистони Бадахшон мебошад! Мо боварӣ дорем, ки ин паҳлавони тавоно дар оянда боз ҳам бо ғалабаҳои нав моро шод хоҳад кард!

      Институти илмҳои гуманитарии ба номи академик Баҳодур Искандарови АМИТ бо камоли ифтихор Шакармамад Мирмамадовро барои ин муваффақияти беназир табрик гуфта, барояш дар ҳамаи мусобиқаҳои минбаъда барору пирӯзиҳои нав таманно мекунад! 

Ба пеш, ба сӯи қуллаҳои нав!  Зинда бошанд варзишгарони тоҷик!