26 майи соли 2026 дар толори Институти илмҳои гуманитарии ба номи академик Б. Искандарови АМИТ, дар доираи нақшаи чорабиниҳо бахшида ба 35-солагии Истиқлолияти давлатии Ҷумҳурии Тоҷикистон, маҳфили илмиву адабии «Хирад» бахшида ба 25 соли фаъолияти илмию адабии доктори илми филология Қаландариён Ҳоким Сафар дар мавзуи «Нақши адабиёт дар рушди афкори солими ҷомеа» бо шукӯҳу шаҳомати хос ва дар фазои гарму хотирмон баргузор гардид.

 Маҳфил на танҳо як нишасти адабӣ, балки таҷассуми эҳтиром ба сухан, фарҳанг, истиқлол ва арзишҳои маънавии миллат буд.

 Чорабиниро муовини директори Институти илмҳои гуманитарии АМИТ оид ба илм доктори илми филология Абдулназарзода А.А. бо сухани ифтитоҳӣ оғоз намуда, оид ба давстовардҳои бузурги даврони Истиқлолият, пешрафти соҳаҳои илму маориф, фарҳанг ва нақши ҷавонон дар рушди ҷомеаи муосир суханронӣ карданд. Ҳамзамон доир ба фаъолият ва нақши доктори илми филология Қаландариён Ҳоким Сафар дар пешбурди Институти илмҳои гуманитарӣ андешаронӣ намуданд. Мавсуф таъкид намуданд, ки Истиқлолияти давлатӣ барои рушди илм, адабиёт ва худшиносии миллӣ заминаи мусоид фароҳам овардааст.

 Сипас, директори Институти биологии Помир Абдулназарзода Абдулназар Ғоибназар дар мавзуи “Илм, амал ва хоксорӣ пешаи ӯст” баромад намуд. Зикр гардид, ки илм танҳо дар ҳамбастагӣ бо амал ва маърифат метавонад ба рушди ҷомеа мусоидат намояд. Қаландариён Ҳ.С. ҳамчун муҳаққиқи соҳибмактаб тавонистааст, ки донишро бо таҷрибаи зиндагӣ ва хидмати содиқона ба илму фарҳанги миллӣ пайванд диҳад.

 Сарходими илмии шуъбаи фолклор ва адабиёти Бадахшони д.и.филол. Охонниёзов В.Д. дар мавзуи “Рисолати олим дар тақвияти хирад” қайд намуданд, ки рисолати асосии олим танҳо ба анҷом расонидани корҳои илмӣ маҳдуд набуда, пеш аз ҳама дар тарбияи маънавии ҷомеа, рушди тафаккури солим ва ҳифзи арзишҳои асили миллӣ ифода меёбад. Мавсуф ҳамзамон фаъолияти илмии д.и.ф. Қаландариёнро намунаи содиқонаи хизмат кардан ба илму фарҳанги миллӣ арзёбӣ намуд.

 Сарходими шуъбаи забонҳои помирӣ, д.и.филол. Н.Офаридаев дар мавзуи “Муҳаққиқи асил ва адабиётшиноси навҷӯ” баромад намуда, фаъолияти илмиву таҳқиқотиии Қаландариён Ҳокимро ҳамчун намунаи талошҳои пайгирона дар роҳи омӯзиши мероси адабӣ махсус зикр намуд.

 Декани факултети филологияи тоҷики ДДХ ба номи М.Назаршоев Беҳроншон Ҷ. дар мавзуи “ Қаландариён Ҳоким муҳаққиқи “Хизонаи омира” баромад намуда, қайд кард, ки осори илмиии ӯ ҳамчун сарчашмаи муҳим арзиши баланди илмӣ ва амалӣ дорад. Таъкид гардид, ки хизматҳои ӯ дар рушди адабиётшиносӣ ва густариши худшиносии миллӣ саҳми назаррас дошта, дар таҳкими пояҳои маънавиии ҷомеа аҳамияти бузург доранд.

 Директори ИИГ доктори илмҳои филология Қаландариён Ҳ.С. дар мавзуи «Нақши адабиёт дар рушди хиради инсонӣ» баромад намуда таъкид карданд, ки дар шароити ҷаҳонишавӣ ва рушди технологияи муосир ҳифз ва омӯзиши адабиёти миллӣ аҳамияти махсус касб мекунад. Маҳз тавассути омӯзиши мероси адабӣ метавонад ҷавононро дар руҳияи худшиносӣ, арҷгузорӣ ба таъриху фарҳанг ва эҳтиром ба арзишҳои миллӣ тарбия намуд.

 Дар идомаи чорабинӣ олимону муҳаққиқон ва аҳли адаб бо маърӯзаҳои пурмуҳтаво баромад намудаанд.

 Дар фарҷоми маҳфил иштирокдорон натиҷагирӣ намуданд, ки гиромидошти хизматҳои олимон ва омӯзиши осори илмиии онҳо барои рушди фарҳанг, тақвияти тафаккури миллӣ ва тарбияи насли донишманду худогоҳ бисёр муҳим мебошад.

Маҳфили илмиву адабии «Хирад» дар умум ба як рӯйдоди хотирмони фарҳангӣ табдил ёфта, бори дигар нишон дод, ки сухани асил ва андешаи созанда дар таҳкими худогоҳии миллӣ ва боло бурдани маърифати ҷомеа нақши бузург доранд.